Budyšin (CS/SN). Wotpohladany Bismarckowy pomnik na Čornoboze je čłonow dźěłoweho kruha za serbske naležnosće města Budyšina na zašłym wuradźowanju zaběrał. K tomu přednjese dr. Friedrich Pollack ze Serbskeho instituta via internet argumenty, kotrež přećiwo pomnikej rěča.

Ze stawizniskeho wida so rozdwojenosć wosobiny Bismarcka, jeho mjeńšinowa politika kaž tež pobrachowacy lokalno­politiski wuznam tak mjenowaneho železneho kanclera projektej spřećiwjeja. Pollack so prašeše, kajka móhła dopomnjenska kultura wupadać, předewšěm pod widom, zo je Čornobóh serbska městnosć dopomnjenja, hdźež běchu so mjez druhim serbske ludowe a spěwne swjedźenje wotměwali. Nimo toho podobizna žanu dosahacu pomnikowu hódnotu nima. Dale Pollack dopominaše, zo bu kult wokoło Bismarcka 1918 skónčeny a hakle z nacionalsocialistami zaso wožiwjeny. Wědomostnik zwurazni swoje wobmyslenja, zo móhł nowy pomnik tych přićahować, kotřiž su runje tajkeho zmyslenja.