Runja mnohim druhim zjawnym zarjad­nišćam tež na Rownjanskim Njepilic­ statoku lětsa wjele zarjado­wanjow přewjesć njemóžachu. Nětko nadźijeja so na lěpše časy klětu.

Rowno (JoS/SN). Prěni sněh tohole lěta je njedawno tež Njepilic statok w Rownom z tróšku běłej pychu pokrył a zaćišć zawostajił, zo je tam wšo w adwentnej ćiši­nje. Cyle tak měrne pak tam scyła njeje. W kuchni wuprudźachu stare kachle přijomnu ćopłotu. Kulturna managerka Njepilic statoka Petra Schubertowa pa­kowaše tam hodowne pakćiki za čłonow spěchowanskeho towarstwa. Dokelž žanu adwentničku přewjesć njemóža, maja woni nětko swój hodowny postrow z póštu dóstać.