Z online-poskitkom bjezdwěla mnohe zajimy spokojiła
Budyšin (SN/MiR). Budyska, online wozjewjena adwentna protyka je lětsa wospjet mnohich zajimcow pohnuła z akterami po dohodownym času pućować. Wšědnje běše woknješko z powabliwymi darami pjelnjene. Mjez akterami běchu tež wjacori Serbja abo wuměłcy, serbske wobsahi posrědkowacy.
Budyski hodowny jandźel, kotrehož zwobraznja Anna-Maria Bretschneiderec, čitaše 1. decembra tekst wo měsće nad Sprjewju. Tři dny pozdźišo zanjese chór Budyšin pěseń z pjera Józefa Nowaka a Bjarnata Krawca „Sněženki“ pod nawodom Michała Jancy. Spěwarjo a spěwarki běchu sej kóždy/kóžda sam/sama blečk w zasněženej krajinje pytali a tam spěw zanjesli. Na wobrazowce běše němskorěčny přełožk podaty.
