We wobłuku kulturneje zymy 2021/22 w Chróšćanskej putniskej hospodźe dyrbjachu hižo wjacore zarjadowanja korony dla wupadnyć. Minjenu sobotu pak smědźachu tam jedne wotměć.

Chrósćicy (MG/SN). Z pomocu přednoška Paula Lipiča z Pančic-Kukowa móžachu so wopytowarjo sobotneho wječorka w Chróšćanskej putniskej hospodźe na slědy wjelka podać. Hosćićelka Monika Gerdesowa bě serbskeho wědomostnika Senckenbergskeho instituta w Zhorjelcu přeprosyła. Wón slědźi na wjelčim projekće w saksko-čěskim regionje. Při tym zaběra so młody muž z akceptancu wjelka w poćahu ke kulturnej krajinje.