Ćežki porod mjenowaše Budyski wyši měšćanosta Alexander Ahrens (SPD) wobzamknjenje hospodarskeho plana města Budyšin za lěto 2022. W tak mjenowanym druhim čitanju jón radźićeljo wobjednachu a po nimale pjeć hodźinach wobzamknychu.

Budyšin (SN/MWj). Po wjele diskusijnych přinoškach, někotrych porokowanjach a wjacorych próstwach wo změnu je Budyska měšćanska rada na swojim wčerawšim posedźenju schwaliła hospodarski plan sprjewineho města za lěto 2022. Z jenož dwěmaj napřećiwnymaj hłosomaj a pjeć hłosawzdaćemi je wulka wjetšina něhdźe 600 stron wopřijacemu dokumentej přihłosowała.