Choćebuz (SN/CoR). Hač do kónca februara chce město Choćebuz antiserbske móranja a nalěpki na tamnišich dróhowych tafličkach wotstronić a sporjedźeć. To rjekny nawodnica wotrjada měšćanske wuwiće a twar Choćebuskeho měšćanskeho zarjadnistwa Marietta Tzschoppe wčera na 26. Choćebuskej zhromadźiznje měšćanskich zapósłancow w swojej wotmołwje na oficialne naprašowanje frakcije Aktiwni njewotwisni wobydlerjo Swobodni wolerjo/Socialny přewrót Choćebuz (AUB-FW /SUB). Dohro­mady tři prašenja bě předsyda frakcije Torsten Kaps w zwisku z dwurěčnymi dróhowymi tafličkami stajił. Na prěnje, wot hdy su městu nadpady znate, skedźbni Marietta Tzschoppe na to, zo maja přeco zaso ze zamazanymi tafličkami činić, často tež politiskich motiwow dla. W specielnym padźe bě zamołwita za naležnosće Serbow Anna Kosacojc-Kozelowa zarjad 10. februara informowała. Hižo samsny dźeń su so z policiju skontaktowali, kotraž bě chłostajomny delikt wozjewiła. Wotpowědne fota a podłožki bě jej zarjad přepodał.