Planowanje a nadawki za efektiwne wužiwanje miliny přepodali

Njebjelčicy (JK/SN). Podobnje mnohim susodnym gmejnam je nětko tež Njebjelčanska zahajiła rozsudny krok k tomu, zlutniwje zasadźeć energiju za nadróžne wobswětlenje. K tomu je na minjenym posedźenju gmejnskeje rady Drježdźanski inženjer Peter Linke z firmy Communalconcept podał pozadk a nadrobnosće k přestajenju wobswětlenja. Te ma so přeměnić na načasny a zlutniwy system LED. Nastajene lampy so zwjetša za jednore přestajenje hodźa, štož technisku změnu wolóža. Wo někotrych lampach w Pěskecach žane podłožki njepředleža a tak tam najskerje cyłu lampu wuměnja. To pak so hakle po tym rozsudźi, hdyž změje Linke wšitko dokładnje wobličene. Za to je gmejnska rada wjesnjanostu Tomaša Čornaka (CDU) społnomócniła, podpisać honorarne zrěčenje z inženjerom Linku.