Róžant (SN/MWj). Po wšěm zdaću hišće lětsa prěnje twarske nadawki za nowu Ralbičansku pěstowarnju wupisaja a tež twarskim firmam přepodadźa. Prawdźepodobnje budźe so při tym wo hłuboko­twarske dźěła jednać. Tole zdźěli wjesnjanosta Hubertus Ryćer (CDU) na wčerawšim posedźenju gmejnskeje rady.

Jeje čłonojo zaběrachu so mjez druhim z hospodarskim planom 2022. W nim je dalše planowanje projekta jedna z najwjetšich inwesticijow komuny. Kaž Ryćer dale zdźěli, ma pěstowarnja po najnowšich wobličenjach 8,1 milion eurow płaćić. 90 procentow z toho dóstanu spěchowane. Swójski podźěl gmejny wučinja přiwšěm něhdźe milion eurow. Při wobličenju je wobkedźbowane, zo móhli wudawki za twaršćizny a scyła za twarske kóšty wo hač do 25 procentow rozrosć. Za to móže gmejna hač do dźesać procentow wjace spěchowanja dóstać.