Towarstwa su spušćomna zepěra komunalneho dźěła a přinošuja k připóznaću a nahladnosći gmejny
Jako najmłódši serbski wjesnjanosta zhladuje Marko Kliman (CDU) w Chrósćicach na dobru bilancu swojeje prěnjeje hamtskeje doby. Tójšto je za gmejnu docpěł, štož jenož jeho njespokoja. Při wšej spokojnosći a wjeselu zbywaja pak nadawki za přichod, kotrež móžneho přichodneho wjesnjanostu wužaduja a na kotrež so zdźěla tež hižo wjeseli.
Hnydom ze spočatkom prěnjeje legislatury čakaše wobšěrny a wužadacy nadawk na młodeho muža, kotryž bě do toho jenož jako gmejnski radźićel nazhonjenja w komunalnym dźěle nazběrał – twar noweje pěstowarnje „Chróšćan kołć“. Puće k tomu bě hižo jeho předchadnik Maćij Brycka runał a Marko Kliman měješe so nětko wo zwoprawdźenje projekta starać. To je so jemu najebać wšě ćeže a problemy, kotrež so při twarje jewjachu, derje poradźiło.
Dróhotwarc w dwójnym zmysle