Najstarša šulerska starobna skupina bičwolejbula je při Olbersdorfskim ­jězoru pola Žitawy wuchodosakske ­finale přewjedła. Šulerjo 10. a 11. lětnika Serbskeho gymnazija Budyšin (SGB) wubědźichu sej we wurisanju ­„Młodźina trenuje za olympiju“­ ­

mjez šěsć šulemi bronzu.

Při rjanym słónčnym wjedrje wotmě so kónčne regionalne koło starobneje skupiny II w bičwolejbulu. K Olbersdorfskemu jězorej pola Žitawy dojědźechu sej zastupjerjo pjeć gymnazijow a Wyšeje šule Niska, zo bychu w pěsku swoje kmanosće dopokazali a kwalifikanta za krajne finale zwěsćili. W tutej bulosportowej družinje wobsteji mustwo stajnje z hólčeje a holčeje dwójki kaž tež z měšaneho porika. Turněr při Olbersdorfskim jězoru wotmě so po systemje „best of three“, tak zo so jednotliwe partije 3:0 abo 2:1 ­skónčichu.