Kaž ćopły dešć je za město Běłu Wodu kóžde lěto spěchowanje, kotrež přewostaja energijowy koncern LEAG. Z toho profituja najwšelakoriše towarstwa za swoje projekty.

Běła Woda (AK/SN). Z dohromady 60 000 eurami podpěruje energijowy koncern LEAG w tymle lěće towarstwowe žiwjenje za powšitkownowužitne zaměry. Měšćanska rada je wčera rozsudźiła, kak srědki rozdźěla. 12 000 eurow dóstanu towarstwa we wobłuku młodźinskeje ­pomocy, 7 200 eurow we wobłuku dobroćelstwa, 10 800 eurow we wobłuku kultury a 30 000 eurow w sportowym wobłuku. „Hač do 31. měrca móžachu towarstwa swoje próstwy wo spěchowanje w měšćanskim zarjedźe zapodać“, rozłoži wyši měšćanosta Torsten Pötzsch (Klartext). Kotre z tychle próstwow wob­kedźbuja, su syć za młodźinske dźěło, měšćanske towarstwo a sportowy zwjazk města namjetowali. Tak derje kaž lětsa rozdźělenje srědkow hišće ženje njebě, wyši měšćanosta wuzběhny.