W Budyšinje hotuja so na lětuši staroměšćanski festiwal

Budyšin (CS/SN). Staroměšćanski festiwal wot 2. do 4. septembra móže so lětsa bjez wobmjezowanjow wotměć. Tele dobre poselstwo wozjewištaj Dietmar Stange a Norbert Reichelt z Budyskeho turistiskeho towarstwa na wčerawšej nowinarskej konferency w sprjewinym měsće. Wusměrjeny je festiwal předewšěm na stare město. Te po měnjenju zastupjerjow turistiskeho towarstwa mjenujcy njeje hišće tak wožiwjene, kaž by to přiměrjene było. Hesło lětušeho festiwala w sprjewinym měsće je „Woda – wuměłstwo – swěca“.