Trjebin (JoS/SN). 112. posmjertnym narodninam Hanza Šustera wěnowane bě minjenu njedźelu hudźbne dopołdnjo na Trjebinskim Šusterec statoku. Zahajili su dźeń w bróžni z Božej słužbu, kotraž bě na wjacore wašnje wosebita. Swjećiła je ju mjenujcy fararka Jadwiga Malinkowa, kotraž je so z tym z maćerneho časa do swojeho zastojnstwa jako Slepjanska fararka wróćiła. Nětko so wona na wjele rjanych rozmołwow z wosadnymi wjeseli. Nimo toho chce zwěsćić, hdźe je nanuzowany koronowy čas slědy we wosadźe zawostajił.