Serbske kinowe předstajenje pod hołym njebjom wulki wuspěch było
Pančicy-Kukow (SN/MWj). Njewočakowany wulki wothłós měješe minjeny pjatk w Pančicach-Kukowje kinowe předstajenje pod hołym njebjom na nowym wjesnym srjedźišću, hdźež je něhdy hosćenc stał. Župa „Michał Hórnik“, młodźinski klub Pančicy-Kukow a tamniši kružk młodych swójbow farskeje wikarije běchu přeprosyli na premjeru dźěćaceho filma „Mała wjera“. Z wjace hač 300 wopytowarjemi su so wočakowanja organizatorow wjace hač spjelnili. Předewšěm swójby z dźěćimi su tónle poskitk dźakownje wužili a zhromadnje zabawny wječor dožiwili.
