Budyšin (CRM/SN). „Před dwaceći lětami wopytachu někotři z něhdyšich židowskich wobydlerjow ze swojimi dźěćimi zaso naše město a modlachu so z nami tu na městnje kadiš. Jich zasowidźenje w starej domiznje zarjadowachmy tehdy jako swjedźeń wujednanja. Nowu do­miznu běchu woni w USA a Israelu kaž tež w hessenskim Pfundstadće namakali. Mjeztym pak hižo nichtó z tutych nacionalsocializm přežiwjenych žiwy njeje. Na nich chcemy dźensa wosebje spominać“, praji Hans-Eberhard Kaulfürst. Wón běše njedźelu znowa, a to hižo 33. raz na modlenje kadiša stajnje na prěnjej njedźeli septembra přeprosył. Přeprošenje sćěhował běše tež zaso kantor Michal Foršt z Praskeje židowskeje wosady. Wutrobnje powitany bu tónraz tohorunja nowy Budyski wyši měšćanosta Karsten Vogt.