Witalij je jedyn z 86 000 Ukrainjanow, kotřiž su po nadpadźe Ruskeje na Ukrainu jako ćěkancy w Němskej dźěłać započeli. Poł lěta je hižo muler pola Šěrakec twarskeje firmy w Konjecach.

Budyšin (SN/mb). „Smy spokojom z nim“, praji Rafael Šěrak dźensa Serbskim Nowinam a so wjeseli, zo je ukrainska swójba z pjeć dźěćimi w Serbach derje integrowana. Mandźelska mulerja dźěła w Chróšćan hladarni. So wě, zo je wšědna komunikacija na dźěle „serbsce, němsce, rusce, z wočimi, rukami, Google-translatorom atd.“, tak Šěrak, dale wulke wužadanje. Ale „wšo běži“, zawod liči tuchwilu dołhodobnje ze spušćomnym dobrym sobudźěłaćerjom. Herbert Brücker, eksperta za migraciju na Instituće za wuslědźenje dźěłowych wikow a powołanjow (IAB), wočakuje hladajo na ukrainskich ćěkancow na dźěłowych wikach hač do kónca lěta přirunujo ze stawom februara 2022 hač do 210 000 přidatnych dźěłowych mocow w Němskej. Tak praješe „medijowej skupinje Funke“.