Stare protokole Budyskeje měšćanskeje rady online přistupne

Budyšin (SN/MWj). Wšitke wot rady města Budyšina mjez lětomaj 1623 a 1832 wjedźene radne protokole hodźa so nětko online čitać, zdźěli měšćanske zarjadnistwo. Protokole su wažne žórło za slědźerjow, přetož w tychle podłožkach nadeńdu woni nimale wšitke podawki a naležnosće města a jeho wobydlerjow. Nimo informacijow wo twarskich naprawach jewja so prawniske rozestajenja, socialne problemy a dawkowe prašenja. Dale dokumentuja protokole personalnu zestawu měšćanskeje rady. Zwjetša so radźićeljo jónu wob tydźeń k wuradźowanju zetkachu. Měšćanski pisar je z toho protokol napisał.