Złyčin (AK/SN). Hač do kónca septembra je we Łazowskim Domje Zejlerja a Smo­lerja widźeć wosebita wustajeńca pod ­hesłom „Hdyž je molowanje hobby“. Hans-Jürgen Menges ze Złyčina wustaja tam swoje wolijowe a dalše mólby.

Mjez druhim widźeć su motiwy łužiskich hatow. „Tam smój sej wšudźe z kolesom dojěłoj“, powěda 79lětny. Z mandźelskej Dorotheju bě wón při Hórni­kečanskim jězoru, při Marijinym haće we Wysokej, při Wulkim haće pola Hućiny, při Łučnym haće pola Dołheje Boršće a při Čornej truze pola Chrjebje. Hdźež mandźelskaj pozastanjetaj, Hans-Jürgen Menges fotografuje. Na nastatych wobrazach so jeho wolijowe a akwarelowe twórby pozdźišo orientuja.