Radźićeljo maja rozdźělne měnjenja wo hladanju historiskeje drohoćinki

Njeswačidło (JK/SN). Z jednoreje informacije je so na wčerawšim posedźenju Njeswačanskeje gmejnskeje rady čiła diskusija wuwiła. Wjesnjanosta Gerd Schuster (CDU) radźićelam zdźěli, zo je gmejna dała dwaj dubaj a jedyn jasnik za hrodom pušćić. Štomy stejachu při přirowje, kotryž wodu z parka wotwjedźe a tak přepławjenju parka zadźěwa. Nimo toho běchu štomy zdźěla hižo wobškodźene a chore a hrožeše strach, zo hałzy dele padnu a škodu nadźěłaja. Po prašenju radźićelki Ramony Clauß za wudawkami za akciju zahaji so horca diskusija. Dźěše wo to, štó je zamołwity za hladanje a porjad w parku a w hrodźe. Wjacorym radźi­ćelam dźe to předaloko, hdyž so gmejna tajkim dźěłam wěnuje a při tym mocy a pjenjezy nałožuje. Su dźě wažniše nadawki, hač park a hród hladać. Skerje ­bychu so tam zasadźane pjenjezy měli nałožować k wobnowjenju pěstowarnje a šule abo znajmjeńša za wažniše naprawy gmejny. Park a hród wotedać do statnych rukow tež hižo njeńdźe a tak maja dale nadawk, so wo kulturnje hódny objekt starać.