Zdźěr (UM/SN). Zwjazkowu dróhu B 156 móža dale wutwarić. Krajna direkcija Sakskeje je štwórty twarski wotrězk wot Brězynki do Zdźěrje přizwoliła a za to zwěsćenje plana wobzamknyła (SN informowachu). „Wažny wotrězk B 156 móže so tuž wobšěrnje ponowić. Runočasnje nastanu na tymle wotrězku kolesowanska šćežka a busowe zastanišća bjez zadźěwkow“, zdźěli prezidentka krajneje direkcije Regina Kraushaar. Twarski knjez budźe krajny zarjad za dróhotwar a wobchad (LASuV). Nimale 3,4 kilometry dołhi wotrězk započnje so po informacijach Reginy Kraushaar 300 metrow sewjernje Brězynki a skónči so 200 metrow sewjernje Zdźěrje. „W tymle wobłuku je B 156 přewuska. Jězdnja je w špatnym stawje a dróha njeje derje přewidna. Wobchadna wěstota je tež tohodla poćežena, dokelž wotbočitej wokrjesnej dróze do Wulkeje Dubrawy a Zdźěrje we wótrym kuće.“