Lessingowe město trjeba wodźerjow – tež serbskorěčnych
Kamjenc (SN/MWj). Na wšelakore wašnje přihotuje so město Kamjenc na 800. róčnicu prěnjeho naspomnjenja, štož chcedźa 2025 z wobšěrnym programom woswjećić. Dokelž w jubilejnym lěće wosebje wjele wopytowarjow wočakuja, pytaja hižo nětko zajimcow, kotřiž móhli potom skupiny turistow po měsće wodźić a jim jeho wosebitosće zbližić. „Měšćanski wodźer njeje jenož profesionelny posłužbowar w turizmje, ale tež reprezentant swojeho města“, měni Bernd Moschke. Wón hižo 20 lět wopytowarjow po Kamjencu wodźi. Před lětomaj běchu z nim čłonojo Domowinskeje skupiny Pančicy-Kukow po Kamjenskich hasach po puću.
