Ćisk (AK/SN). Po wobšěrnym ponowjenju a rozšěrjenju su minjeny pjatk Ćišćansku wodarnju Wojerowskich zastaranskich zawodow VBH oficialnje přepodali. Město dotal 8 600 produkuja tam nětko 11 500 kubiknych metrow wody wob dźeń. Tak zastaruje zawod wjace hač 40 000 ludźi we Wojerecach a wokolinje, nimo toho tójšto přemysłowych a industrijowych zawodow. „Je to prěni zwoprawdźeny projekt změny strukturow w našim měsće“, wuzběhny jednaćel VBH Wolf-Thomas Hendrich. Hromadźe z dalšimi hosćimi wotkry wón wulki pisany grafiti Běłowodźanskeho wuměłca Renéja Krunera. Wobraz předstaji, kak wažna woda za žiwjenje je.