Měšćanske zarjadnistwo wo nowosćach mosta dla informowało

Budyšin (CS/SN). Jedne z neuralgiskich městnow za nadróžny wobchad w Budyšinje, křižowanišćo při Serbskim ludowym ansamblu, ma so na kružny wobchad přetwarić. Tole zdźěli wyši měšćanosta Karsten Vogt (CDU) na nowinarskej rozmołwje. Z tym so nadźijeja, zo móže wobchad lěpje ćec, hač z tuchwilnej amplu. Zo pak móhli kružny wobchad scyła twarić, dyrbja róžkowe twarjenje wottorhać. Z wobsedźerjom tuchwilu jednaja. Wobchadni planowarjo wuchadźeja z toho, zo z nowym rjadowanjom nadróžny wobchad harmonizuja.

Dale wyši měšćanosta informowaše, zo chcedźa so za twar noweho mosta nad Sprjewju wo spěchowanje z hornca za změnu strukturow prócować. Trěbne podłožki dyrbja hač dosrjedź oktobra ­zapodać. Wuměnjenje je, zo měšćanska rada w septembru projektej přihłosuje. Dale Vogt zdźěli, zo je město ležownosće za rozšěrjenje parkowanišća na Schliebenowej mjeztym kupiło. To woznamjenja, zo móža parkowanišćo tež bjez noweho mosta rozšěrić.