Budyšin (CS/SN). Rozprawu wo skutkowanju dźěłoweho kruha za serbske ­naležnosće města Budyšina je jeho rěčnik Benjamin Wirth na wčerawšim posedźenju měšćanskeje rady přednjesł. ­Najprjedy pak wabješe wón za XIV. mjezynarodny folklorny festiwal, kotryž so wot­ dźensnišeho hač do njedźele w ­Budyšinje, Hochozy a Chrósćicach wotměje.

Wirth zwěsći, zo je so zhromadne dźěło z měšćanskim zarjadnistwom porno zašłym lětam bytostnje polěpšiło. Na tym wulki podźěl ma wosobinski referent wyšeho měšćanosty André Wucht. Wón je so wo wjele wobsahowych naležnosćow starał a měješe wulki podźěl na tym, zo je infołopjeno wo dwurěčnosći za přemysłownikow nastało. Lětak móhł pomhać, zo so předsudki wottwarjeja, tak Wirth. Wón porokowaše, zo so dźěłowy kruh w přewulkich časowych wotstawkach zetkawa. Mjez wuradźowanjemi měło maksimalnje tři měsacy chwile być, tak zo měło so znajmjeńša pjeć zetkanjow wob lěto přewjesć. Dołheho mjezyčasa dla so wažne rozsudy druhdy dlija­.