Sulšecy (AK/SN). Do Sulšečanskeho wjesneho swjedźenja knježi we wsy stajnje trochu napjatosće. Spěwar a moderator Heiko ­Harig so kóžde lěto z wjesnym předstejićerjom Jurjom Brösanom sadźi. „Potom je jenož hodźina chwile nadawk spjelnić“, rozprawjataj předsyda Sulšečanskeje Halštrowskeje młodźiny Józef Bělk a předsyda wjesneho kluba Frank Kral. ­„Jónu dyrbješe w běhu hodźiny 30 mopedow typa Simson na swjedźenišćo přijěć. Dalši raz bě rjećaz bowow wot Čorneho Halštrowa hač na swjedźenišćo trěbny.“ Přěhrali Sulšečenjo sadźenje hišće ženje njejsu. To ma tež k lětušemu wjesnemu swjedźenjej wot 14. do 16. julija tak ­wostać.

Přihoty traja stajnje wjacore měsacy. Terminy z hudźbnikami, DJjemi a ­dalšimi maja so dołhodobnje wotrěčeć. „EWAG nam nuzowy milinowy agregat přewostaji. Tón trjebamy, zo by naša ­jewišćowa technika bjezporočnje fungowała“, praji Józef Bělk. Wjesny klub, wjesna rada, wohnjowa wobora a Halštrowska młodźina wjesny swjedźeń hromadźe organizuja. Mnozy z 290 wobydlerjow wsy sobu pomhaja. Mjez druhim natwarja stan a jón wupyša.