Wot spočatka měrca 1992 wuchadźeja Serbske Nowiny jako wječornik. A wot toho časa je pomocnicy w mnohich wjetšich a mjeńšich wsach čitarjam do domu noša. Najwjetši čas tuž našich pilnych roznošowarjow w lětnjej seriji předstajić (16).
Kaž na našich wsach, tak tež w Budyšinje čitarjo na swój serbski wječornik čakaja. Tuž dyrbja jón tež w měsće roznošować. W Budyšinje su pjećo, kotřiž so wo to staraja. Jedyn z nich je 72lětny Christof Kreher. Wšědnje popołdnju po štyrjoch nastaja so wón z kolesom do Smolerjec kniharnje a sej tam wotličene mnóstwo nowin wotewza. Roznošować ma nowiny wokoło tak mjenowaneje Wuchodneje kupnicy. Cyłkowna čara, kiž jeho mjez druhim na Pfaffowu, Becherowu a Paulijowu wjedźe, je něhdźe štyri kilometry dołha. Je zajimawe, kak je k tomu dóšło, zo wón mjeztym hižo sydom lět dypkownje a spušćomnje Serbske Nowiny roznošuje.
