W Rakecach móža so na dobry financielny zakład złožować

Rakecy (JK/SN). Prěnje posedźenje Rakečanskeje gmejnskeje rady po lětnjej přestawce bě za radźićelow a wjesnjanostu Swena Nowotneho (CDU) dosć přijomne. Přičina spokojnosće běše rozprawa nawodnicy financneho zarjada gmejny Franciski Pfeiffer wo wuwiću a stawje lětušeho hospodarskeho plana. Połoženje je jara dobre, nic jenož pola dochodow, ale tež pola wudawkow. Prěnje połlěto je so za gmejnu jara derje wuwiło. Dźakowano wo 5 000 eurow zwyšenym klučowym připokazanjam wokrjesa a dalšim přidatnym 8 000 euram pola inwestiwnych klučowych připokazankow móže sej gmejna za lětsa a klětu planowane ­inwesticije woprawdźe dowolić. Swójski podźěl je za wšitke štyri wulke inwesticije zaručeny. Nětko trjebaja jenož hišće próstwy wo spěchowanske srědki zapodać. Termin je kónc awgusta.