Pěskecy (JH/SN). Hłownaj iniciatoraj třećeho winoweho swjedźenja w Pěskecach Křesćan Bejmak a Fabian Korjeńk běštaj sobotu wječor samaj překwapjenaj, jako přidruži so jimaj po witanju hosći ně­hdyši Njebjelčanski farar Michał Brězan. Wostrowčan bě zhromadnje z Wojerowčanom Křesćanom Bulankom do Pěskec přijěł a dwójku Korjeńk/Bejmak z wosebitym namjetom překwapił. „K wino­wemu swjedźenjej słuša tola winowa kralowna w rjanym šaće, abo?“, rjekny duchowny na wuměnku předsydźe Sportoweje jednotki Pěskecy Fabianej Korjeńkej. A njetraješe dołho a prěni muž na čole Pěskečanskich sportowcow ćehnješe jako paža předrasćeny z winowej kralownu Michaelu I. do wulkeho swjedźenskeho stana. Wobaj so pokłoništaj, sej winko připištaj a hosćom pod nawodom akordeonista Floriana Bejmaka serbski walčik „Hanka, budź wjesoła“ zarejowaštaj.