Mjeztym 30. raz su sej konjacy sportowcy z Pančičanskeho jěchanskeho towarstwa „Při Klóšterskej wodźe“ wokoło předsydki Sandry Berndtoweje wjele dźěła naparali a mjez druhim sakske mišterstwo w mnohostronskim jěchanju w Hórkach wuhotowali. Wo wotpowědne čary na łukach a polach wot Hórčanskich lěsow hač do Hrańcy so starać, zadźěwki twarić, městna za připowěšaki přihotować, wšo to su jenož někotre z nadawkow, kiž so w předpolu wokoło Hórčan stadiona stawachu. Tola njewšědnje wulka próca je so wupłaćiła. Nimale 200 jěcharjow z dohromady pjeć zwjazkowych krajow bě so ze swojimi konjemi za jubilejny turněr přizjewiło.