Pěskecy (SN/MWj). Z wokrjesneje wustajeńcy rasowych nuklow minjeny kónc tydźenja w Großröhrsdorfje je so wjelelětny a nazhonity plahowar Achim Weclich z Pěskec z dobyćom wróćił. Ze štyrjomi ze swojich dołhokosmatych liškowych nuklow je 67lětny titul wokrjesneho mištra dobył. „Tajke dobyće ma za mnje jara wulku hódnotu, dokelž běchu plahowarjo z cyłeho wokrjesa zastupjeni“, powěda Pěskečan.
W Großröhrsdofje bě 60 wustajerjow z 370 nuklemi zastupjenych. Porno časej do korony wšak je to mało. Před lětami je so w Kamjencu wjace hač sto wustajerjow ze 710 nuklemi wobdźěliło. Přiwšěm so Achim Weclich nad swojim dobyćom wjeseli. „Jako plahowar so prócuješ, zo su wšitke twoje zastupjene nukle rjane a předpisam wotpowěduja. Hdyž maš jenož jenički trochu špatniši eksemplar pódla, hižo šansu na dobyće nimaš.“
