Měšćanscy radźićeljo wyše staršiske přinoški za pěstowarnju schwalili

Kulow (AK/SN). Město Kulow chce 2024 swoje torhošćo porjeńšić. Tole zdźěli nawoda twarskeho zarjada města Stephen Rachel srjedu na posedźenju měšćanskich radźićelow. Při dźensnišej Krabatowej steli chcedźa mjedźanu skulpturu chorwatskeho obrista Janka Šajatovića (1624–1704) nastajić.

Nadawk we wobjimje 80 000 eurow přepodachu hižo 20. nowembra Jörgej Tauschej ze Slepoho. Moler, restawrator a wučer za wuměłske kubłanje na Slepjanskej šuli bě hižo za Krabatowu wustajeńcu w Budyšinje postawu Šajatovića jako jěcharja a ławku Šajatovića na Wojerowskim torhošću stworił. Nowa postawa w Kulowje ma pokazać Šajatovića, kiž na stelu kaž tež na katolsku cyrkej hlada. Při skulpturje maja informaciska tafla, ławki a małe zelenišćo nastać, tak zo móžeš tam pozastać. „Klětu w juniju chcemy skulpturu poswjećić“, praji Stephen Rachel. „Potom swjećimy 400. narodniny Janka Šajatovića.“ Nimo toho chcedźa na Kulowskim torhošću dalše ławki, městna za přizamknjenje kolesow a reparaturnu připrawu za kolesa za dohromady 68 000 eurow nastajić.