Wojerecy (SiR/SN). Po měsće dundać, hwězdy ličić a dobyć – pod tymle hesłom přeprošuje marketingowe towarstwo Wojerowski region swójbow na wosebitu akciju, kotruž hišće hač do kónca lěta pod mjenom „#WHY!NACHT“ přewjedu. Z kampanju chcedźa domjacym wikowarjam a přemysłownikam wjace kedźbnosće wěnować a wobydlerjow kaž tež wopytowarjow na nich skedźbnjeć. Za to wobstarachu zelene Ochranowske hwězdy, kotrež nětko w mnohich wukładnych woknach wisaja, rozłoži sobudźěłaćerka marketingoweho towarstwa Anja Hillmann.

Štóž chce so na dobyćerskej akciji wobdźělić, móže so hač do 31. decembra w starym a nowym měsće na puć podać a wšitke zelene hwězdy we wukładnych woknach zličić. We wšitkich wobdźělenych wobchodach maja wosebite karty, kotrež dyrbiš wupjelnić a na nich prawu ličbu zelenych hwězdow nakřižować. „Wobdźělene předewzaća spóznaja wobydlerjo a wopytowarjo na nalěpku z hesłom „#WHY!NACHT““, praji hospodarski spěchowar města Robert Böhme.