Budyšin (CS/SN). Hnydom na zjawnej hodźinje naprašowanjow před zawčerawšim posedźenjom Budyskeje měšćanskeje rady je financny měšćanosta dr. Robert Böhmer (njestronjan) wuzběhnył: „Porno druhim městam mamy pozitiwnu financnu situaciju w Budyšinje. Naša likwidita dowoli nam nadal fleksibelnosć jednanja. Druhe města tutu situaciju hižo nimaja.“ W njezjawnym posedźenju měšćanskich radźićelow pokaza dr. Robert Böhmer na to, zo dyrbješe město najebać to planowanski deficit wurunać, kotryž zwisuje z tym, zo ma město wokrjesej wjace pjenjez płaćić, hač dóstanje na financnej podpěrje z Drježdźan. „Perspektiwa hladajo na měšćanski etat je komplikowana, napřećiwny trend njemóžu spóznać,“ wón praji. Böhmer widźi pak wulki potencial w nowym slědźenskim centrumje (LAB), kotryž změje w Budyšinje swoju domiznu. Na dochodach z přemysłoweho dawka su lětsa porno loni 4 miliony eurow wjace dóšli. „To wšak zdźěla tež z inflaciju zwisuje,“ praji Böhmer.