W Běłym Chołmcu 20. raz žiwu adwentnu protyku organizowali

Běły Chołmc (AK/SN). Pola Helmichec w Běłym Chołmcu wonješe krótko do hód wosebje rjenje za horcym winom, poprjančkami a pomazkami. Bě to 13. a předposlednja stacija žiweje adwentneje protyki. 20. raz su ju lětsa přewjedli. Iniciatorka Maren Behrens, kotraž bě wot 2004 hač do 2014 wjesna předstejićerka, jón kóžde lěto hromadźe z towarstwom Pjeć počasow organizuje.

Sobu skutkowała je mjez druhim wnučka Lisa Helmich. „Sama sym namjetowała, zo móhła na huslach adwentne pěsnje zahudźić“, 31lětna powěda. Prjedy hač přećahny jeje swójba do Wojerec, bydleše wona hač do pjateho žiwjenskeho lěta pola wowki w Běłym Chołmcu. Pozdźišo je w Bayerskej powołanje husletwarče nawuknyła. Z tymle powołanjom je so wona 2018 w Mnichowje zesamostatniła. We wobłuku žiweje adwentneje protyki zahudźi wona na huslach, kotrež je za huslerja w Aachenje twariła. Tež hdyž instrument hišće lakěrowany njebě, wón wulkotnje klinčeše.