Budyšin (CS/SN). Njeserbske dźěćace dnjowe přebywanišća w měsće Budyšinje do serbskeho žiwjenja zapřijeć postupuje. Wo tym je Ilka Heilmann, w měšćanskim zarjadnistwje za kubłanje a socialne přisłušna, na posedźenju dźěłoweho kruha za serbske naležnosće města Budyšina wčera w radnej žurli rozprawjała. Tak běše loni w nowembrje zetkanje nawodnicow dźěćacych přebywanišćow w nošerstwje města w Serbskim muzeju. Muzejowa pedagogowka Monika Ošikowa je derje přihotowaše, kubłarki su sej mnohe nowe dopóznaća wudobyli. Wothłós bě přewšo pozitiwny, rjekny Heilmann, předstajene poskitki chcyli zarjadnišća w přichodźe cyle wěsće wužiwać. Na přikład su kubłarki zadźiwane byli, zo su poskitki, nimo móžnych wudawkow za material, bjezpłatne. Zasadnje je tomu tak, zo w pěstowarnjach serbske swjedźenje a nałožki rólu hraja. Jim pak kubłarki-maćeršćinarki pobrachuja. Tute koncentruja so w serbskich dźěćacych zarjadnišćach a tajkich w swobodnym nošerstwje z Witaj-skupinu.