W něhdyšim Greenparku bydlenja z wobstajnym hladanjom nastali

Budyšin (UM/SN). Štóž je bywši dom za požadarjow azyla w tak mjenowanym Budyskim Greenparku při Flincowej posledni raz před něhdźe lětom widźał, drje kompleks z třoch bydlenskich domow lědma zaso spóznawa. Tehdy prezentowachu so domy jenož takrjec jako skelety bjez wonkownych sćěnow. Dźensa wuhlada wopytowar barbnje wuhotowane twarjenja z wulkimi woknami. Wopyt wšak tak jednorje scyła móžny njeje, znajmjeńša nic bjez přizjewjenja. Wšako jedna so wo priwatnu ležownosć a bywši Greenpark słuži dźensa cyle hinašemu zaměrej.