W zarjadniskim zwjazku Při Klóšterskej wodźe w Pančicach-Kukowje maja wot spočatka lěta Sernjančana Andréja Kobera jako noweho wobydlerskeho policista.

„Jako wobydlerski policist reprezentuju policiju na městnje. Steju při prašenjach kołowokoło policajskich naležnosćow k dispoziciji. Z tym skići so wobydlerjam krótki puć k rjadowanju wobstejnosćow,“ wón rjekny.

Krute sydło ma André Kober dale w Kamjenskim policajskim rewěrje, rěčne hodźiny pak poskićuje kóždu wutoru wot 16.00 do 18.00 hodź. a po dorěčenju w Pančicach-Kukowje. „Njejsym do wšědneho dnja policistow na rewěrje zapřijaty, ale wupomham při wosebitych słužbach kaž běše to njedawno na přikład při stawkowanju burow.“