Před dobrymi dźesać lětami je so Grodkowski Serbski kwasny ćah rozpušćił. To njech je składnosć pohladać do zašłosće a so zdobom prašeć, hdźe su jednotliwe dźěle drasty wostali.

Grodk (JoS/SN). Před wjace hač 120 lětami słušeše Grodkowska serbska narodna drasta hišće k wšědnemu wobrazej w měsće a wokolinje. Po lěće 1900 bu wona přiběrajcy ze wšědneho dnja wutłóčena. Připućowani dźěłaćerjo w tekstilnej a so rozwiwacej brunicowej industriji k serbskosći we wokolinje žadyn poćah njemějachu. Serbska drasta so ze wšědneho wobraza města zhubi.