Za dwaj tydźenjej zaso wulki swjedźeń w sprjewinym měsće
Budyšin (CS/SN). Na lětušim Budyskim nalěću budźe změna perspektiwy. Na Hłownym torhošću njebudu ludźo na jewišćo do směra na měšćansku apoteku hladać, ale do směra sukelnicy. Po měnjenju organizatorow přihladowarjo tak lěpje widźa. Hłowne torhošćo wot radnicy k sukelnicy trochu spaduje, tak zo w zadnich rynkach potom trochu wyše stejiš. Kak so akustiske poměry přez to změnja, chcedźa wočaknyć.
Kaž stajnje na Budyskim nalěću, kotrež so wot 24. do 26. meje wotměje, změja tři jewišća: na Hłownym torhošću, na Žitnych wikach a na Mjasowych wikach. Na nich je dohromady 40 hudźbnych přinoškow planowanych. Při wuběranju wuměłcow su na regionalnosć dźiwali. A tež serbske přinoški njepobrachuja. Sobotu předstaji Serbski ludowy ansambl na Žitnych wikach wot 17.30 hodź. swój program „Swět filmoweje hudźby“ z orchestrom a solistami. Njedźelu wot 11 hodź. zahudźa Chróšćanscy muzikanća na Hłownym torhošću, w samsnym času kapała Horjany na Žitnych wikach. Tam wustupi wot 14 hodź. dorostowa skupina SLA Łužičanka.
