Swjaty Pětr je pohončam po wšěm zdaću derje zmysleny, wšako su łuki kołowokoło pomnika w Chrósćicach zrumowane. Syno je w bróžni a tak móža so nětko poslednje přihoty dodźěłać, zo bychu so wot soboty (15.06.) potom zapřahi z wjacorych zwjazkowych krajow w Chrósćicach wubědźować móhli. Mjeztym šěsty króć zarjaduje Konjace sportowe towarstwo „Při Klóšterskej wodźe“ Pančicy-Kukow lětsa separatny turněr za zapřahi. A tak su so organizatorojo lětsa rozsudźili, sakske a zdobom durinske mišterstwa pola dwupřežnych zapřahow zarjadować. W Durinskej njeje so žadyn kmany organizator namakał, tak přijědu kónc tydźenja tež durinscy pohončojo do Hornjeje Łužicy.

Zašłe dny su lubowarjo konjaceho sporta a pomocnicy twarili, barbili, šrubowali a sadźeli. Tak změje na 60 zapřahow wot soboty najlěpše wuměnjenja, zo móže so w dresurje, jězdźenju po parcoursu z kehelow a w přezpólnym pruwowanju idealnje pokazać.