Wjesna młodźina wječorny program předstajiła a jako chór wustupiła

Njebjelčicy (AKr/SN). Njebjelčanska młodźina je zašły kónc tydźenja wšitkich wjesnjanow a hosći zbliska a zdaloka na pisany kónc tydźenja přeprosyła. Započał je so wón pjatk nawječor z party inkluzije. Po lońšej premjerje su tež lětsa zaso wječor ze zbrašenymi a za nich wuhotowali. Přitomni přińdźechu ze zarjadnišćow z Pančic-Kukowa, Smječkec abo Kamjenca. Woni mějachu swoje wjeselo při rejowanju abo při hrach, kotrež běchu młodostni z wjele lubosću přihotowali a přewjedli. Zbrašeni su so hižo dlěje na tutón podawk wjeselili.