Wulke a mjeńše muzeje, domizniske stwy a njewšědne wustajenišća zbližuja zajimcam zajimawostki najwšelakorišeho razu. Z lětušej lětnjej seriju někotre z nich kaž tež takrjec za kulisami skutkowacych akterow předstajamy. (1)

Serb abo zajimc, ručež na internetnu stronu Sakskeho muzeja za ludowe wuměłstwo w Drježdźanach hlada, so dźiwa. Digitalneho wopytowarja překwapi wid na figuriny w serbskich narodnych drastach. Su to mjez druhim drasta z Wojerowskeje kónčiny kaž tež z Njeswačidła. Wustajene figuriny su jenož mólički ­wuběr wjace hač 300 objektow, kotrež so w archiwach muzeja chowaja. Su to mjez druhim pohladnicy, debjene jutrowne jejka kaž tež wušiwanki. Štóž chce so nadrobnje informować, móže to na internetnej stronje muzeja z podaćom konkretnych zapřijećow, kaž mjena městow, wsow a wosobow.