Rozsud nošerja AWO, Witaj-skupinu w Bukecach po wjele lětach rozpušćić, njewuwabi jenož mjez staršimi a Bukečanskimi Serbami a jich přećelemi wulke njezrozumjenje, přesłapjenje a zrudobu. Zo je so do toho jara pozdźe abo zo njeje so scyła z rozsudnymi akterami rěčało, situaciju njepolěpši. Najbóle ćerpja dźěći. Zhonichu kónc tydźenja wot staršich, zo so jich skupina rozpušći a zo so w běhu tutoho tydźenja do druhich skupin rozdźěla.
Běše hižo planowane, koncept Witaj zaso staršim dźěći ze žłobika předstajić, zo bychu dalše dźěći za skupinu zdobyli. Skupina měješe dotal za Bukečanske poměry chětro wjele dźěći (9) a jara angažowanu maćernorěčnu kubłarku, kotraž kóždy dźeń 45 mjeńšinow z katolskich kónčin do Bukec na dźěło jědźeše. Plan nošerja, z hinašim konceptom pokročować, budźe ze serbskeho wida zwrěšćeć. Jenož kubłanje na maćernorěčnym niwowje z maćernorěčnej kubłarku, metoda imersije, slubi nadźiju za naše ewangelske kónčiny. Njerěču wo rewitalizaciji, ale wo tym, zo wostanje to serbske we wosadźe někak widźomne a słyšomne.
