Wulke a mjeńše muzeje, domizniske stwy a njewšědne wustajenišća zbližuja zajimcam zajimawostki najwšelakorišeho razu. Z lětušej lětnjej seriju někotre z nich kaž tež za kulisami skutkowacych akterow předstajamy. (4)

Štwórć lětstotka je Dom Měrćina Nowaka z krasnej zahrodu hižo w Njechornju jako muzej přistupny. Wšitke lěta je so Róža Pinkawina ze susodneho Worcyna hłownje wo hosći starała, je jich po kuchni, dobrej stwě, přehladce na hornim poschodźe kaž tež po ateljeju w susodnym twarjenju wjedła. Bórze po tym, zo bě jako młoda wučerka 1959 z Radworja do Worcynskeje šule přišła, nawjaza styki ze znatym molerjom, spisowaćelom a publicistom. Hłuboki poćah hač do dźensnišeho traje. Rady wona wopytowarjam swoju wědu wo wuznamnym čłowjeku sposrědkuje. Wčera hakle je Róža Pinkawina Brankačkec swójbu z Prahi z 1990 zemrětym mějićelom a wobydlerjom domskeho na tutym awtentiskim městnje zeznajomiła.