Hamor (AK/SN). Techniska uniwersita Drježdźany wupruwuje wot tutoho tydźenja mjez dwórnišćom w Klětnom a Bjerwałdskim jězorom awtonomnje jězdźacy, z wodźikom ćěrjeny bus. Cyłe lěto chcedźa jón fachowcy wupruwować a wuslědki dokumentować. Partnerojo projekta su Zaměrowy zwjazk Hornja Łužica a Delnja Šleska (ZVON), Institut Fraunhofera ze Žitawy, gmejna Hamor a lokalne předewzaća.
Cyłkowna suma kóštow za projekt z mjenom „Awtomatizowane jězdźidła z wodźikom we wjesnych kónčinach“ je 5,5 milionow eurow. Swobodny stat Sakska a zwjazkowy minister za hospodarstwo a škit klimy projekt spěchujetej. „Naša wizija je, zo změje wobydler móžnosć, sej bus z pomocu smartfona skazać“, to podšmórny póndźelu na posedźenju Hamorskeje gmejnskeje rady inženjer dr. Ronny Werner. Wón je docent w fachowym wobłuku za spalowanske motory a ćěridłowe systemy na Drježdźanskej Techniskej uniwersiće. „Ideja do přichoda je: Z wodźikom k wowce na wopyt jěć móc“, wón doda.
