Budyšin (SN). We wobłuku projekta „Mjeńšinowa politika a konfliktny potencial“ so tuchwilu wosom wučerkow, wučerjow a profesorkow z Moldawskeje, Georgiskeje a Ukrainy na studijnej jězbje w Sakskej wobdźěla. Nazymska wuprawa skići wobdźělnikam mjez druhim móžnosć, so ze serbskim ludom a jeho aktualnymi wužadanjemi roze­stajeć. W fokusu wuprawy steji rozestajenje z mjeńšinami w šulskej wučbje.

Po tym zo su prěnje dny w Lipsku pobyli a so tam mjez sobu zeznali, po­dachu so nětko do Budyšina. Prěnja stacija za nich bě Serbski dom. Referentka za kubłanske naležnosće pola Domowiny Katrin Suchec-Dźisławkowa wobdźělnikam wo Serbach w Hornjej, srjedźnej a Delnjej Łužicy přednošowaše. Tak je mjez druhim wo aktualnych wuwićach w politice abo na kulturnym polu rozprawjała. Tež Domowinu jako třěšny zwjazk Serbow je wona mjezynarodnym hosćom předstajiła a dohlad do dźěławosće Domowiny skićiła. Hosćo zajimowachu so mjez druhim za to, hač so w šuli eksplicitnje serbske stawizny wuča abo štó so wo wuwiće serbskich šulskich knihow stara.