Kulow (SR/SN). Bjeze třěšneho zwjazka Kulowskich młodźinskich klubow z mjenom „United Clubs for Kulow“ drje w měsće a wokolinje někotrežkuli zarjadowanje móžne było njeby. Zwjazkej přisłuša dźewjeć klubow a dalšich 19 swobodnych čłonow. „Smy poprawom wójmidło (Bindeglied) mjez wšelakorymi čłonami a skupinami“, praji Vivien Jahn, čłonka předsydstwa zwjazka.

Do rjadu organizowanych zarjadowanjow słušeja nimo jara woblubowaneje Silvestinale na kóncu lěta na přikład póstnicy, jutrowne reje, dźěćacy festiwal abo Kulow-cup. Wězo su tež serbske swjedźenje dźěl lětneho programa. W awgusće su čłonojo zwjazka dźěćacy a młodźinski centrum AWO we Wojerecach wopytali, zo bychu tam dohromady 500 eurow přepodali. Zwjazk United Clubs for Kulow pak organizuje a přewjeduje tež dźěłowe akcije. Na poslednim tajkim su čłonojo mobilnu rampu natwarili – nic jenož na dobro zbrašenych. Rampa je tež w padźe pohibowanja ćežkich nastrojow po schodźenkach jara wužitna.