Slepo (AK/SN). Z 2,2 milionomaj eurow podpěruje Swobodny stat Sakska gmejnu Slepo při financowanju twarskich naprawow za wotwodźowanje wjesnych wopłóčkow. To zdźěli wjesnjanosta Jörg Funda (CDU) wutoru na posedźenju gmejnskeje rady. Dźakowano tutym srědkam je gmejna kmana, třeći twarski wotrězk systema za wotstronjenje wjesnych wopłóčkow zwoprawdźić. „Po wobzamknjenju kabineta krajneho knježerstwa smy spočatnje 4,4 miliony eurow za naprawu dóstali, kotrež smy za twar wakuumoweje klumpoweje stacije wužiwali“, rozłoži Steffen Seidlich, nawoda zarjada za planowanje, twarstwo a hórnistwo zarjadniskeho zjednoćenstwa Slepo, na posedźenju. „W běhu twarskich dźěłow smy pak zwěsćili, zo srědki njedosahaja“. Wospjet je tohodla Slepjanski wjesnjanosta rozmołwy ze zastupjerjemi swobodneho stata w Drježdźanach wjedł. „Prócowanja běchu wuspěšne. Kraj Sakska jedna z tym po zasadźe jenakeho wobchadźenja“, Steffen Seidlich naspomni a doda, „klětu w nalěću zahajimy dźěła třećeho twarskeho wotrězka, kónc lěta ma wšitko hotowe być“.