Žadanja krajnoradneho zarjada so tež w Delanach wuskutkuja

Róžant (JK/SN). Přepodaće nadawkow za poslednje dźěła na nowotwarje Ralbičanskeje pěstowarnje a skazanje nowych digitalnych taflow za Ralbičansku zakładnu a wyšu šulu běštej dwě z temow na wčerawšim posedźenju gmejnskeje rady Ralbicy-Róžant. Město schorjeneho wjesnjanosty Hubertusa Ryćerja (njestronjan) jeho zastupjer René Wjacławk posedźenje nawjedowaše.

Za nadawk k wěstemu zamknjenju noweje Ralbičanskeje pěstowarnje běchu po wupisanju dóšli tři poskitki. Najlěpši měješe Kamjenska firma Sämann. Wona nětko wšu za zamkanje trěbnu techniku za 6 900 eurow zatwari. Kalkulowane běchu tele wudawki z 10 000 eurami.

Šulerjo a wučerjo Ralbičanskeje zakładneje a wyšeje šule smědźa so na nowej digitalnej tafli wjeselić a k tomu słušace připrawy. Zbywaca suma z projekta zwjazka „Digitalpakt“ zmóžnja, zo Halštrowska firma diversys.IT za 21 800 eurow tafli a wotpowědne zwiski w šuli instaluje a pozdźišo w serwisu tež hlada a funkciju zaruči.