W Ralbicach plany za nowu wosadnicu předstajili

Ralbicy (JK/SN). Žurla na Radlubinje bě połnje wobsadźena, telko zajima pokazachu wosadni a wjesnjenjo pjatk wječor w Ralbicach za předstajenje projekta k nowotwarej Radlubina. Hižo njedźelu do toho bě wosadny farar Sćěpan Delan wjesołu powěsć wozjewił, zo je Drježdźansko-Mišnjanske biskopstwo nowotwarej wosadnicy w Ralbicach přizwoliło. Farar Delan poda tež zawod do wječora, rysujo hišće raz dołhi puć přihotow twara hač k biskopskej dowolnosći. Dalše, konkretne informacije k projektej a jeho nastaću mjenowaše čłon cyrkwinskeje rady Rafael Včelich.

Wjele dźěła měješe Radworski architekt Měrko Šěrak, prjedy hač móžachu pjatk předležacy projekt předstajić. Farar Delan naspomni dorěčenje mjez wosadu a susodnymi gmejnami Ralbicami-Róžantom, Rakecami a Njeswačidłom, w kotrychž wosadni bydla. Tež prócowanja wo spěchowanje projekta njeběchu lochke a doniž regionalny planowanski zwjazk Hornja Łužica-Delnja Šleska spěchowanje z 75 procentami njepřizwoli, su mnohe dalše spěchowanske móžnosće pruwowali.